D'Fasnacht isch leider scho wider verby
doch s'nöchscht Johr bin ig sicher wider derby,
müed bini jetzt aber grüüsli,
ig zieh mi glaub zrug i mis Hüüsli

Mis nöie Deheim isch jetzt am Stapfackerweg
mi nöii Herbergsmuetter heisst Heidi Kleeb.
I däm Huus düeng me schiins politisiere
das duet mi de au interessiere

Nur, ä längi Stäge füert zu däm Huus
das isch mer de scho chly ne Gruus
do sött ig äuä no is Fitnesszenter go
wenn ig die Dritte aui uf sött cho.

Doch nach däm länge, schwäre schnooge
wett ig mi de scho i Garte woge.
Dört steit de sicher öppis für mi parat,
villicht chly Äppeeri oder es Blatt Salat

Es grosses Pool heigs au i däm Garte
dört dueni de uf di Resu warte.
De due ig de chly mit ihm umepantsche
und du Heidi, luegsch haut derwyle zu dine Pflanze.

Doch wiiterbüude wet ig mi de scho au e chly,
chönnt villicht de mou bi dim Sohn verby.
Dä duet schins bi me ne ehemalige Herbergsvatter d'Stifti mache,
dört git's sicher z'gseh e Hufe interessanti Sache

Au kulturell due ig mi sehr interessiere,
do drüber cha ig mit Dir sicher guet diskutiere.
Schliesslich ghöre ig zum kulturelle Guet vo Biberischt,
do verzöue ig de sicher gar kei Mischt

Gäu Heidi, mir gö de au zäme uf d'Pischte,
das mir au nöchscht Hilari vüu hei z'brichte.
Ig gseh, bim Heidi Kleeb bi ig guet ufghobe
Ig fröie mi sehr, und das isch nid gloge.


Biberist, 25. Februar 2004
Dr Obernarr
M. Sutter

D'Narreschriiberin
E. Steiner

D'Verfassere
D. Sutter